يقولوا إن الزين بس للصبايا!!
حكي الجياكر صدق ماخوذ خيره
عندي حبيب ٍ فيه كل المزايا
فوق الشهامة أشهد إنه "دميرة" !
له نظره تسوِي سواة و سوايا
و رزة عقال ٍ ما هي لحد غيره
و غمازتين هناك صوب الشفايا
و نظرات عين ٍ يالخلايق خطيرة
ودي أشوفه كل لحظة معايا
عيني بصيرة بس يدِي قصيرة
صرت ألمحه في عين كل الزوايا
و أموت لا جا ذكره بأي سيرة
أترك عشانه كل عمري ورايا
و أبنيله بوسط الحشا ألف ديره
سبحان من خلى االحسن فيه آية
قلبي هواه و مدري وشو مصيره
من يوم شفته .. الوصل صار غاية
و رسمت في لحظة أماني كبيرة
و أظنني تناسيت كل البلايا
و عيوبه صارت في عيوني صغيرة
(كحيان) و (منتَف) قليل العطايا
بس أشعر بظله بأني أميرة !!
يرمي سهام العشق أحسن رماية
و (ينيشن) قليبي و ينثر عبيره
كذاب ٍ و يحلف ماله سوايا..
... و لا جا يناديني ينادي "سميرة"!
لكن أحبه , , يا بلاه و بلايا
و أبقى أتحمل سلبيات ٍ كثيرة
لأني وهبته الروح و أجمل هدايا
حب ٍ على إخلاص ٍ مع شوي غيرة
و صرت أعذره و أهيم به في عمايا
و أقول يرجعلي و يعقل مسيره
جنن قلوب الناس و أحلى الصبايا
و طيرلي قليبي , ملعون خيره !!!
ليست هناك تعليقات:
إرسال تعليق